• Hasiera
• FICAB
• FICAB IX

Bidasoako Arkeologi Zinemaldiaren aurtengo edizioak programa osoa eta askotarikoa eskaintzen du, hainbat garaietako eta gaietako luzera askotako filmekin. Guztiek ezaugarri komun bat daukate: lehenaldira gu eramateko duten gaitasuna.

Arratsaldeetan Amaiako proiekzio areto handian egongo diren lau saioetan 22 obra elkartuko dituzte, guztiek Epaimahaiaren Sari Handia jasotzeko aukera izango dute, baita hedapen zientifikoaren Arkeolan Saria eta, nola ez, Publikoaren Saria ere bai, zeina ikusleen esku geratzen baita.

Aurten BNAZak berriro ere eskainiko digu espazioan eta denboran zeharreko bidaia bat. Neardentalengandik hasita garai modernora hurbildu arte, bidean egiptoarrak, babilonioak, feniziarrak, etruskoak, iberiarrak, traziarrak, erromatarrak eta mocheak aurkituko ditugu, eta beren kulturaren gauzarik liluragarrienak transmitituko dizkigute. Bidaia geografikoa aurrekoa bezain luzea izango da: Ordizia edo Kuartango bezain hurbil dauden tokietatik, Sahara, Bulgaria, Estonia, Filipinak, Israel, Jordania edo Peru bezain urrutikoak diren tokietara eramango gaituzte edizio honetako ekoizpenek.

Oraingo honetan amaierako jardunaldiak protagonista berezi bat izango du. Goizean Oiasso Museoan egingo den sari banaketaren ondoren, Amaiak berriz irekiko ditu ateak Agora aurkezteko, Alejandro Amenábarren azken filmea. Lehiaketatik kanpo proiektatuko da IV. mendeko Alexandria asaldatuaz hitz egiten digun film hau.

2009ko edizioak “Ikus-entzunezko komunikazioa Historia eta Arkeologia museoetan” jarduera paraleloa gehitu du. Museoetako eta ikus-entzunezko ekoizpenetako profesionalentzako topaketa bat da. Haren helburua museoen erakusketa-diskurtsoetan topaketarako plataforma bat eskaintzea da, teknologia berrien erabilpenaz eta ikus-entzunezko baliabideez eztabaidatzeko.

BNAZen guztiontzako tokia dago. Iaz esaten genuen bezala, atera zaitez etxetik, zatoz zinemara, Arkeologia zure zain dago eta.